"Титаник" кемаси чўкканига бу йил роппа-роса 100 йил тўлади. Олимлар бу улкан кеманинг ғарқ бўлишига сабаб бўлган янги гипотезани олға суришди. Техас университети олимлари 1912 йилнинг 15 апрел куни улкан муз чўққисига тегиб, ғарқ бўлган деб қаралган "Титаник" трагедиясига доир қуйидаги саволни ўртага ташлашди: "Ўша улкан муз нимага айнан шу ерда эди?".
Гипотезага кўра, "Титаник" фалокатидан уч ой олдин Ер, Қуёш ва Ой камдан кам ҳолда кузатиладиган вазиятда эди. Бу давр фанда "Супер ой" даври деб юритилади. Ой Ерга 1400 йил ичида энг яқин масофага яқинлашган, бунинг натижасида майдонга келган тўлин ойда денгиз сатҳи жуда кўтарилган. Бу табиий ўзгариш натижасида "Титаник"ни ғарқ қилган муз тоғи ҳалокат содир бўлган жойга сузиб келган. Қилинган ҳисоб-китоблар муз тоғининг шимолдан фалокатдан уч ой олдин, яъни Ойнинг Ерга энг яқин масофада яқинлашган пайти ажралганини кўрсатган.
