"ISTIQLOL"DAN EKSKLYuZIV REPORTAJ!
Birinchi qatordan shundoq orqaga razm solsangiz, 4200 ta boshga
ko‘zingiz tushadi, ayrim o‘rindiqlarda ikkitadan, yosh bolajonlarni, chaqaloqlarni
ushlab olganlarni ham nazarda
tutganda bu hissa yana ortadi. Yonimizda ikkitagina bo‘sh joy bor edi, birontasining qo‘liga tekin chipta, taklifnoma tushgan bo‘lsa, kelmay qolgandir degan o‘yda edik. Yo‘q, halloslagancha, peshona terini
arta-arta ikki yoshi ulug‘ opa-singillar
joylashib oldi. "Bir oydan beri shu konsertni orziqib kutamiz, aylonoy. Axir,
30 kun oldin Zomindan kelib chipta xarid qilib
ketganmiz, mana zo‘rg‘a yetib keldik” deya fikrini bildirgandek bo‘lgan bu opa
shu bo‘yi konsert oxirigicha, ko‘zlariga ishonqiramay o‘tirdi: Nahot, sahnada
kuylayotgan Ozodbek! Dardli qo‘shiq aytsa yig‘ladi, sho‘xiga vazni halaqit bersa-da amallab o‘ynadi ham, hatto
xonandaning otasi ikkinchi qatorda
o‘tirganidan xabar topib, otaxonni raqsga ham
chorladi...Xullas, karomat borini ko‘rsatdi! Bu biz guvoh bo‘lgan kichik bir voqea edi. Muxlislar
bilan bog‘liq bunday antiqa voqealar
konsert davomida sanoqsiz bo‘lganiga ishonaman. Parda ochilishi bilan bahasham
sahnadan ko‘z quvnadi. Butun sahna
oldiyu orqasi ekran bilan qoplangan! Hatto sahna tepasida milliy ruhiyatni
saqlab qolish uchun piyolaga
o‘xshash dekoratsiya ham qo‘ndirilgan. Hammasi ajoyib! Qarsaqli musiqa sadolari ostida intiq kutilgan, diydori odamlarga juda yaqin
xonanda paydo bo‘ldi. "Xush keldingiz” deya kuylab, ta’zimda barcha
muxlislarini qabul qildi. Kirish so‘zida soch tolasidan
oyoq barmoqlarigacha titroqda
turganini, muxlislar qo‘llab-quvvatlashi
unga dalda bo‘lishini ta’kidladi. Konsert davomida kuylangan "Bir, ikki, uch”, "Onam ruhi”, "Sevgi " kabi
taronalarni muxlislar katta hayrat
bilan qarshi olgan bo‘lsa,
megaxit "Kutaman”ning remiksi va "Xorazmcha” qo‘shiq qo‘llarni raqsdan charchatdi-yov! Xonandaning qo‘shiqlaridan
keyingi xulosaviy gaplari tomoshabinlarni sehrlab qo‘ydi. Eng qizig‘i, muxlislar xonandaning nigohini,
ko‘z o‘qi qayoqqa qaraganini ilg‘ab, rosmanasiga rashk qilib, balkonning chap tomonidan qichqirdi: "Bizga ham qarab
gapiring, Ozodbek”. Kichik hazil
e’tiborsiz qolmadi. Sahnadagi
yulduz nafaqat nigohi balki mehr nuri bilan u tomonlarni ham chaqnatdi. Bu dargohdan hech kim norizo bo‘lib ketmasin, degan
o‘yini isbotlaganiga qoyil qoldik. Bu yil ham yana bir shogirdini keng ommaga taqdim
etdi. U ajoyib dasturda "Ajoyibsan-da” deya kuyladi. Konsert kulgusiz qizimasligi
aniq. Biroq, qiziganni qaynatishning yangi yo‘lini o‘ylab
topgan rejissyor Sa’dulla Abdullaev ishonchni oqladi. U kashf etgan "taqlidchilar”
guruhi, shundoqqina ko‘z oldimizda ko‘plab mashhurlarning 2050-yildagi holatini tasvirladi-qo‘ydi! Mana
sizga, futurologiya (kelajakka bashorat)! Qoyil qolmaslikning aslo iloji yo‘q. Ekranda qarigan Ozodbekning yillar sarhisobidagi qiyofalariga mos ravishda ma’lumotlar
berildi: 2025 yil 91 kun, 2050 yil ya’ni, 76 yoshida 245 kun ikki mahaldan
muxlislarini xursand qiladi...Original
kulgu! 63 ga chiqqan Poziljonov, Abdulla Qurbonov qariligida "Otalar so‘zi-aqlning
ko‘zi”da boshlovchilik qilishi, G‘iyos Boytoyevning 50 yildan beri
mo‘ylovi orqasidan kun ko‘rishi haqidagi
ichakuzdi hazillar ko‘zlardan hatto yosh chiqarib yubordi. Rayhon
momoning Nazarbekovning "Majnuntolning novdalarini” o‘z lahjasida
kuylagani shu qadar ishonarli chiqdiki,
Rayhonning o‘zi kelibdi, deganlar ham
topildi. Xonandaning "Yorim arazlab ketdi” qo‘shig‘iga
Parizodaning evrilib raqsga tushishi esa ko‘ngillarni xushnud etdi. Axir,
sevimli raqqosani oilali bo‘lgandan beri sahnaga qaytishini sog‘inib qolgandik. Muhriddin Xoliqovning "Yig‘lama qiz”i "sahna qiroli"ga aylangan shogirdi
ijrosida jonli kuylangani, ustozning ruhini chinakamiga shod qilgan bo‘lsa, ne ajab? "Dadajon”. Oila - jamiyat asosi. Uning mustahkamligini ta’minlaydigan
javobgar ota-ona farzandiga nimalar deyishi kerak? Bu qo‘shiq yaxshigina javob bo‘la oldi!
Navoiysini, Buxoriyini bilmagan farzand buyuk ajdodlarimiz, buyuk millatga
munosib avlod bo‘la oladimi? Ozodbekning
unib kelayotgan bolajonlar tarbiyasiga ham
mas’ul ekanini unutmagani e’tiborga molik. Axir, bugun uning konsertiga
ota-onasi qo‘li bilan yetaklab
kelayotgan bolalari shu ko‘rganlaridan kezi kelib andoza oladi. O‘tmish va
kelajak o‘rtasida bugundan ko‘prik yasash
uchun hofizning o‘zi komil bo‘lmog‘i
kerak. Bu borada, ishonamiz, Nazarbekovga! Shundan so‘ng, "Onasi borlarga havas qilamiz, onasi yo‘qlar, kelinglar, bir
dardlashamiz” deya "Ona ruhi” dardli xonishini kuyladi. Tomoshabinlar holatini o‘zingiz tasavvur qilavering! "Xafa bo‘laman” qo‘shig‘iga
esa ko‘rinishidan yoshligiga qaytgan
O‘zbekiston xalq artisti Rushana
Sultonova zaldan sahnaga ko‘tarilib, impravizision ravishda yal-yal raqs
ulashdi. Shunday qilib, dasturning
kulminasion, ta’bir joiz bo‘lsa, global nuqtasiga yetib keldik! Ozodbek zalni
to‘ldirib turgan qorako‘zlarga haqli ravishda qo‘shig‘i orqali savol tashladi:
"Bundan ortiq yana nima kerak
bizga?”. Bugun arzimas tashvishlardan noliydigan, pashshadan fil
yasaydigan fuqarolar ham oramizda
topiladi. Qo‘shiq va unga mos tarzda yaratilgan videolavhalar
etni junjiktiradi. Talmovsiragan, turli-tuman ofatu tahdidlar qurshovida qolgan dunyoga bir nazar tashlasak, qanday zamon va makonda emin-erkin
yashayotganimizni yana bir bor esga olish fursatiga oshno tutinasiz va
bexosdan, "Shukur, Yaratganga shukur" deb yuborasiz. Xonanda mas’uliyatni a’lo
darajada uddaladi. Xalq hofizi
sifatida yelkasida turgan vazifani ado etdi. Konsert finalini shukronalikka yo‘g‘rilgan sho‘x tarona bilan yakunlar
ekan, bir yil davomida nimalar demoqchi ekanini xulosa tarzida bayon etdi,
kuychi. Buni qay darajada
uddaladi, muxlislarning o‘z shaxsiy tahlillarida! Muhimi, u o‘zbek san’ati
tarixi sahifalariga ma’naviy boy konsert tushunchasini muhrlay oldi. Aslida
konsert mo‘may daromad orttirish manbai emas! Madaniy hordiq doirasida tafakkur gulshaniga o‘z hissasini qo‘shmoqlik maqsadi ekanligini boshqa
xonandalarga ham o‘rnak sifatida
dars qila olgani uchun "Xush
keldingiz” deya qarshi
olgan, yuzlab mehnatini, kuch-g‘ayratini safarbar qilganlarga
tasannolar yig‘indisi yog‘ilganini aytgimiz keldi! Xulosa. DID.YaXShI QO‘ShIQ.FAYZ!
Konsertni konsert darajasida ushlaydigan shu uch omilni birlashtira
olgan, ular uchrashgan chorraha markazida esa yana
o‘sha Nazarbekov! G‘alaba, yangi g‘alaba
muborak, o‘zbek san’ati iftixori! Rekord sari yo‘l ochganingiz rost bo‘lsin,
Bek!