Google компанияси Сан-Францискодаги ишлаб чиқувчилар конференциясида кейинги авлод Android 4.1 Jelly Bean операцион тизимида ишловчи Nexus 7 планшет компьютерини тақдим этди.
Asus компанияси билан ҳамкорликда ишлаб чиқилган планшет тўрт ядроли Nvidia Tegra 3 процессорига, диагонали 7 дюйм бўлган дисплейга ва 1,3 мегапикселли камерага эга. Компьютер автоном режимда 9 соатгача, кутиш режимида 300 соатгача ишлаши мумкин. Қурилманинг вазни 340 грамм. Интернетга уланишни Wi-Fi таъминлайди. Ичига ўрнатилган NFC модули электрон тўловларни амалга ошириш имконини беради.
Янги қурилманинг нархи хотирасининг ҳажмига қараб 199-249 доллар атрофида. Экспертларнинг фикрича, бу Google, Apple ва Microsoft ўртасидаги рақобатни янада кескинроқ қилади. Компьютер сотувга июль ойи ўртасида чиқарилади, дея хабар беради ИТАР-ТАСС. Таҳлилчилар график характеристикалари ва қийматини "таблетка”нинг кучли томони сифатида кўрсатишмоқда.