Замонавий ўзбек кино санъати янги босқичга кўтарилди. Зеро, фильмни суратга олиш техникаси кун сайин тараққий этмоқда. Томошабиннинг диди, дунёқараши ҳам ўзгарган. Энди уни бир қолипга тушиб қолган воқеалар-у… қаҳрамонлар билан алдаб ҳам, ҳайратлантириб ҳам бўлмайди. Фильмга қизиқиш уйготиш учун бугун ҳар бир ижодкордан янгилик яратиш талаб этилмоқда.
Аввалига Нозим Тўлахўжаев билан ҳамкорликда "Мактуб” фильмини суратга олган режиссёр Шерзод Шоҳалилов ўз ижодий жамоаси билан кенг фантазия ва катта иштиёқ билан "Севги фариштаси” фантастик комедиясини мухлислар эътиборига ҳавола қилди.
"Sher Shoh cinema” студияси маҳсулоти бўлган ушбу кинолойиҳада Алишер Узоқов, Дилниёз Ғаффоров, Адиз Ражабов, Асал Шодиева, Мурод Ражабов, Хамид Тошпўлатов, Муяссар Бердиқулова, Аҳад Қаюм, Шаҳзода Муҳаммедова иштирок этишди. Саундтрекни Алишер Узоқов ижро этган.
Қисқача сюжет
Жасур (Алишер Узоқов) ва Фаррух (Дилниёз Ғаффоров) қалин оғайни. Улар бир институтда ўқишади. Кунлардан бирида ўқишга кетаётган Жасурни автомобиль уриб юборади. Шифокорлар қанчалик ҳаракат қилишмасин, уни сақлаб қолишолмайди. Фаррух дўстининг маъракаларини ўтказиб, ётоқхонага қайтиб келади. Хонасига кириб, кўзини юмади. Шунда дўстининг овозини эшитади. Кейин эса унинг ўзини тирик одамдай яққол кўради...
Шу тариқа руҳ дўстига бир вазифани бажариш учун "қайтиб келганини” айтади. Қизиғи, руҳ фақатгина Фаррухга кўринади...
Ўхшашлик
Ушбу картина икки дунё оралиғида қолиб кетган руҳ акс этган Болливуднинг Амитабх Баччан иштирокидаги "Безовта руҳ” фильми ва Голливуднинг қатор фильмларини эслатиб юборади. Зеро, фильм ғояси ҳам айнан улардан андоза олиб яратилган бўлса ажабмас. Шакл қайтарилган бўлиши мумкин, лекин ижодкорлар уни янгича мазмун билан бойитишга ҳаракат қилишган.
Ютуқлар:
- Чин дўстликни тараннум этувчи бу фильм дастлабки кадрларданоқ томошабинни ўзига жалб қила олди. Картинада Голливуд фильмларидек компьютер графикаси асосида ишланган кўплаб махсус эффектларга гувоҳ бўлиш мумкин. Бу омил фильмнинг томошабоплигига хизмат қилади.
- "ЭлДиДо” гуруҳининг аъзоси Дилниёз Ғаффоров дастлаб "Келганди келин-2. Анжанча муҳаббат” фильми билан катта экранларда намоён бўлиб, режиссёр Рустам Саъдиевнинг "кашфиёти”га айланганди. Унинг иккинчи роли ҳақида ҳам фақат ижобий фикр билдириш мумкин.
- Алишер Узоқов бу сафар ҳам комик қиёфада. Лекин у фаолияти давомида ҳали ижро этишга улгурмаган руҳ образини талқин қилди. Айрим саҳналарда унинг драматик ҳолатга киришиб кетганини кўриб, бўлар экан-ку, деб юборасан киши. Эҳтимол, шу фильмдан кейин режиссёрлар уни драматик ролларга ҳам таклиф қилишар? Ҳар ҳолда актёрда бунинг учун барча имкониятлар бор.
Эътирозлар:
· Дилноза (Асал Шодиева) ва Улуғбек (Адиз Ражабов)нинг қаҳвахонадаги саҳнаси. Дастлаб шаҳарнинг кундузги қиёфаси кўрсатилади. Орадан бир неча сония ўтмасданоқ, кейинги кадрда шаҳарга оқшом чўкиб улгурган... (!)
· Фильмда "интрига”си суст. Экранда қарама-қарши кучлар, зиддиятлар янада жонли ва шиддатли бўлганида эди, бу кураш томошабинни ҳам жалб этарди.
· Мурод Ражабов талқин қилган факультет декани образи бизга "Севгинатор”даги деканни эслатиб юборди. Ўша қаҳрамон, ўша қиёфа, ўша мимика, ўша актёр...
Фактлар:
Ø Картинада 20га яқин ижодкор иштирок этган.
Ø Фильм 26 кун давомида суратга олинган.
Ø "Экскурсия” саҳнаси Самарқандда, 3 кун давомида суратга олинган.
Ø "Туғилган кун” саҳнасини суратга олиш тонггача давом этган.
Ø "Финал” саҳнаси табиий чиқиши учун 3 кун вақт сарфланган.
Ø Махсус эффектлар студиянинг ўзида яратилди. Улар устида 4 киши ишлаган.
Ø Шоир Аҳад Қаюм Бегзод ролини талқин қилди. Аввалига унинг 4 саҳнада иштирок этиши кўзда тутилган эди. Аммо шоирнинг бошқа лойиҳаларда бандлиги туфайли бу қаҳрамон линияси охирига етмай қолди.
Ø Картина 1, 5 соат давом этади.
