Los-Anjelesda "Oskar” kino mukofotiga nominantlar
e’lon qilindi. Stiven Spilbergning "Linkoln” filmi 12 ta nominatsiyada ko‘rsatilgan
bo‘lsa, nominatsiyalar soni bo‘yicha ikkinchi o‘rinda Eng Lining "Pining hayoti”
filmi kelmoqda.
"Eng yaxshi film” nominatsiyasiga yuqoridagi
filmlardan tashqari, Mixael Xanekening "Muhabbat”, Ben Afflekning "Argo
operatsiyasi”, Tom Xuperning "Xo‘rlanganlar”, Kventin Tarantinoning "Ozod
bo‘lgan Jango”, Devid O.Rasselning "Yigitim - telba”, Ketrin Bigelouning
"Birinchi raqamli nishon" va Ben Zaytlinning "Yovvoyi janub hayvonlari”
kartinalari da’vogarlik qilmoqda. Rejissyorlar nominatsiyasida Xaneke, Zaytlin,
Li, Spilberg va Rassel ko‘rsatilgan.
Eng yaxshi ayol roli uchun mukofotni Jessika Chesteyn
("Birinchi raqamli nishon"), Kvenjane Uollis ("Yovvoyi janub hayvonlari”),
Naomi Uotts ("Imkonsiz”), Jennifer Lourens ("Yigitim - telba”) va Emmanuel
Riva ("Muhabbat”) olishi mumkin. Uollis butun Oskar mukofoti tarixida bosh
rol uchun nomzodi qo‘yilgan eng yosh aktrisaga aylandi: uning yoshi bor-yo‘g‘i
9 da.
Erkaklar nominatsiyasida Bredli Kuper ("Yigitim - telba”), Deniel
Dey-Lyuis ("Linkoln”), Xyu Jekman ("Xo‘rlanganlar”), Xoakin Feniks
("Usta”) va Denzel Vashington ("Ekipaj”) taqdim etilgan.
Ikkinchi plandagi eng yaxshi erkak roliga Kristof Vals ("Ozod
bo‘lgan Jango”) , Robert de Niro ("Yigitim - telba”), Alan Arkin ("Argo
operatsiyasi”), Tommi Li Jons ("Linkoln”) va Filipp Seymur Xoffman ("Usta”)
nomzodlari qo‘yilgan. Ikkinchi plandagi ayollar roliga Salli Fild ("Linkoln"),
Enn Xeteuey ("Xo‘rlanganlar"), Xelen Xant ("Surrogat"), Jeki
Uiver ("Yigitim - telba") va Emi Adams ("Usta")taqdim etilgan.
To‘liq metrajli multfilmlar toifasida "Jasur yurakli” (rejissyorlar
Mark Endryus va Brenda Chepman), "Frankenvinni" (Tim Byorton), "Paranorman,
yoki zombini qanday qo‘lga o‘rgatish mumkin" (Sem Fell va Kris Batler),
"Qaroqchilar! Omadsizlar bandasi" (Piter Lord) va "Ralf" (Rich
Mur) filmlari da’vogarlik qilmoqda.
Rossiyadan nomi ko‘rsatilgan Karen Shaxnazarovning "Oq yo‘lbars"
multfilmi short-listga kirmadi.
Amerika kinoakademiyasining mukofotlarini 85-bor topshirish marosimi 24 fevral
kuni Los-Anjelesda bo‘lib o‘tadi. Uni "Griffinlar” multserialining yaratuvchisi
Set Makfarleyn olib boradi. U aktrisa Emma Stoun bilan nominantlarni e’lon qildi.
