Италиялик футболчининг хурмача қилиқлари мураббийнинг жонига теккан кўринади.

"Манчестер Сити" клуби ҳужумчиси Марио Балотелли ва жамоа бош мураббийи Роберто Манчи шанба куни Англия кубогининг учинчи босқич доирасида бўлиб ўтадиган "Уотфорд" билан ўйин олди машғулотлари чоғида уришиб кетишди. 

Manchester Evening News нинг хабар беришича, жанжал шу қадар авж олганки, уларни клуб ходимлари базўр ажратиб олишган. 22 ёшли италиялик футболчи эса бўлиб ўтган воқеадан 10 дақиқа ўтиб, базадан кетиб қолган. Айтишларича, муштлашувга Балотеллининг Скотт Синклейрга қўпол подкат ишлатгани сабаб бўлган. Энди унинг яна жамоани тарк этиши ҳақида гапиришмоқда. Балотелли ҳатто шу қишдаёқ Италияга қайтиши мумкин экан.

Эслатиб ўтамиз, Балотелли бундан аввал ҳам ана шундай қилиқлари учун бир неча бор дисквалификация қилинган ва оқибатда 11 учрашувни ўтказиб юборган. Бунинг у "Манчестер Сити" томонидан 340 минг фунт миқдорида жаримага тортилган.