Бахтингдан очайми, тахдингдан?

 Дунёнинг турли бурчагида фолбинлар албатта топилади. Чунки инсон доимо ўз тақдирини, келажагини билишга қизиқиб келган. Омад ва бахтга эришиш, орзуларини рўёбга чиқариш учун турли йўлларни излайди. Қуйида турли халқлар орасида мавжуд бўлган ана шундай усулларни ҳавола қиламиз, лекин унга ишониш ёки ишонмаслик ўзингизга ҳавола.

13 та қоғоз бўлакчаларини олиб, ҳар бирига янги йилда амалга ошишини истаган орзуларингизни ёзиб чиқинг. Ухлашдан аввал ёстиғингизнинг тагига қўйинг. Тонгда уйқудан кўз очганингиз заҳоти, тилакларингиз битилган қоғозларни битта-битта оласиз. Қўлингизга тушган қоғоздаги илк учта тилакнинг Янги йилда амалга ошишига умид қилиш мумкин.

13 та узум доначаларини оласиз. Амалга ошишини истаган ниятингизни дилингизда такрорлаб (масалан, "талабалик насиб этсин”, "турмушим фаровон бўлсин”, "фарзандли бўлай” каби), Янги йил киришига чалинган соат бонги билан бир вақтда узум доначаларини еб улгурсангиз, истакларингиз ижобат топиши мумкин.

Яқин кишингиздан 100 сўмлик танга пулни байрам столига қўйилган ликобчалардан бирининг тагига яшириб қўйишни илтимос қилинг. Ўзингиз эса хонани тарк этинг. Илтимосингиз бажарилганидан сўнг, хонага кириб, яширилган танга пулни топишга ҳаракат қилинг. Агар биринчи уринишдаёқ танга пулни топсангиз, Янги йилда сизни иқтисодий қийинчиликлар таъқиб этмаслиги эҳтимоли юқори.

Янги йил кечасида атрофга қоронғилик чўккан пайт остона ҳатлаб кўчага чиқинг. Ўзингиз яшаётган хонадонга орқа ўгириб, кўнглингиздаги орзуларингиз, тилакларингизни хаёлингизга келтиринг. Сўнг ортга ўгирилиб, ёруғлик порлаб турган хонадон деразаларининг сонини сананг. Агар рақамлар жуфт чиқса, Янги йилда ниятларингиз амалга ошиши мумкин.

Янги йил кечасида алоҳида хонага ўтиб, тақинчоқ занжирни кафтларингиз орасига маҳкам ушланг. Иссиқ ҳароратни сезганингиз заҳоти, тақинчоқ занжирни стол устига отиб юборинг. Ҳосил бўлган илк кўриниш янги йил сизга нималар туҳфа этиши мумкинлигини аён қилади: агар тақинчоқ текис чизиқлар ҳосил қилиб тушса, бу омаддан дарак.

Учта елим халтача олиб, биринчисига тўлиқ тозаланган, иккинчисига ярим тозаланган, учинчисига умуман тозаланмаган ловияларни ажратиб солинг. Янги йил кечасида ёстиғингизнинг остига ловияли халтачаларни қўйинг. Тонгда уйқудан кўз очиб биринчи олганингиз, агар тозаланган ловия халтачаси бўлса, сиз турмушга чиқмоқчи бўлган йигит тадбиркор бўлади. Агар чала тозаланган қўлингизга тушса, демак, бу – шаҳзодангизнинг даромади ўртачалигидан далолат.

Янги йил кечасида ҳар бир хонадонда паловнинг дамланиши анъанага айлангани сир эмас. Ана шу таом учун ажратилган гуручнинг ичига турли баҳода нархланадиган узукларни ташлаб, яхшилаб аралаштирасиз. Сўнг кўзни юмиб, гуруч ичидан узукларни олишга киришинг. Илк қўлингизга илинган узукнинг баҳосига қараб, рўзғорингиз Янги йилда қанчалик тўкин-сочин бўлишини тахмин қилишингиз мумкин

Manba: darakchi.uz